Thursday, April 1, 2010

Pantun (Minang) Budi Pekerti...


Kuaik rumah karano sandi
Rusak sandi rumah binaso
Kuaik bangso karano budi
Rusak budi hancualah bangso


Nan Kuriak iyolah kundi
Nan sirah iyolah sago
Nan baiak iyolah budi
Nan indah iyolah baso


Anak ikan dimakan ikan
Ikan tanggiri di dalam lauik
Sanak bukan famili bukan
Karano budi basangkuik pauik


Tabek ikan panuah dek ikan
Gadang di tabek ikan gurami
Ameh bukan pangkek pun bukan
Budi sabuah nan dicari


Anak nalayan mambaok pangkua
Ditanam ubi di tanah darek
Baban sakoyan dapek dipikua
Budi saketek taraso barek.


Ka puncak barangin rangin
Babelok jalan ka kida
Dilagak urang tak ingin
Budi baiak nan dikaja


Pisang ameh baok balaie
Masak sabuah di dalam peti
Hutang ameh dapek dibaie
Hutang budi dibaok mati


Hiduik batungkek budi
Mati bakalang tanah
Jikok pandai bamain budi
Dalam aie badan tak basah


Ombak baralun manuju pantai
Riak marayok manuju tapi
Indak guno jadi rang pandai
Kalau hiduik indak babudi


Dek ribuik rabahlah padi
Dicupak Datuak Tumangguang
Kalau hiduik indak babudi
Duduak tagak kamari cangguang


Pucuak pauah sadang tajelo
panjuluak buah galundi
Nak jauah silang sangketo
paaluih baso tingkekkan budi


Ngalau dibaliak tapian mandi
Padang kandih pandan tajelo
Kalau tak baiak bamain budi
Ameh habih badan binaso



Sumber: Buku 'Keajaiban Pantun Minang'

No comments:

Post a Comment