Pantun Minang Percintaan...

Pulau Panjang tadorong panjang
Nan di dakek pulau Sambilan
Kasiah sayang tadorong sayang
Indak dapek lai ditahan

Simpang ampek Sukomananti
Padang Tujuah mangko Pinaga
Kok dakek namuah den pai
Ba-a pulo hati rang nan tingga

Jam Gadang di Bukik Tinggi
Sampai bunyinyo ka Birugo
Kasiah sayang jan dihabisi
Sagadang rambuik tinggakan juo

Anak urang Tanjuang Andaleh
Pai ka balai hari sanjo
Bia habih bialah tandeh
Hati den kanai kaba-a juo

Ka suok jalan ka Supinang
Ka kida jalan ka Muaro
Jo suok jawek kasiah sayang
Jo kida apuih aie mato

Kok nak tahu di ladang padi
Di Panti jalan ka Cubadak
Kok nak tahu di hati kami
Lieklah api makan dadak